කර්මාන්ත හා ව්‍යවසායකත්ව සංවර්ධන අමාත්‍යාංශය SLIM සමඟ ව්‍යාපාරික උපදේශකයින් බිහි කරයි
කර්මාන්ත හා ව්‍යවසායකත්ව සංවර්ධන අමාත්‍යාංශය ශ්‍රී ලංකා අලෙවිකරණ ආයතනය (Sri Lanka Institute of Marketing – SLIM) සමඟ එක්ව රාජ්‍ය නිලධාරීන් රටේ ඉහළම ව්‍යාපාරික උපදේශකයින් බවට පරිවර්තනය කිරීම අරමුණු කරගත් විශේෂ වැඩසටහනක් දියත් කර තිබේ.
පසුගිය 04 වැනි දා ආරම්භ කරන ලද මෙම නියමු වැඩසටහන කර්මාන්ත සහ ව්‍යවසාය සංවර්ධන අමාත්‍යාංශයේ කුඩා ව්‍යවසාය සංවර්ධන අංශය (Small Enterprise Development Division – SEDD) යටතේ බස්නාහිර පළාතේ සේවය කරන සංවර්ධන නිලධාරීන් (DOs) සහ ව්‍යවසාය සංවර්ධන පුහුණු නිලධාරීන් (Enterprise Development Training Officers – EDTOs) කෙරෙහි අවධානය යොමු කරයි. නව වැඩසටහන යටතේ ඔවුන් “සම්බන්ධතා නිලධාරීන් / Relationship Officers” ලෙස නම් කරනු ලබන අතර උසස් තත්ත්වයේ ව්‍යාපාර උපදේශන සේවා ලබා දීම සඳහා පුහුණු කරනු ලැබේ.
මෙම වැඩසටහ‌නේ වැදගත් අංශය වන්නේ ජාත්‍යන්තරව පිළිගත් පුහුණුවක් ලබා දීමට පියවර ගෙන ඇති SLIM හි ක්‍රියාකාරී සහභාගීත්වයයි. තෝරාගත් නිලධාරීන් 50 දෙනෙකු ඔවුන්ගේ කුසලතා, හැකියාවන්, ආකල්ප සහ සමස්ත ව්‍යාපාර උපදේශන ධාරිතාව වැඩි දියුණු කිරීම සඳහා නිර්මාණය කර ඇති වෘත්තීය පාඨමාලාවකට සහභාගී වන අතර, ඔවුන් ඉතා දක්ෂ හා ප්‍රායෝගික ව්‍යාපාරික උපදේශකයින් බවට පත් කරනු ඇත.
“සම්බන්ධතා නිලධාරීන්ගේ (RO) මෙම පරිවර්තනය ව්‍යවසායකයින්ගේ සාර්ථකත්වයට සෘජුවම බලපාන වැදගත් සහ බලගතු කණ්ඩායමක් නිර්මාණය කිරීමක් ලෙස මම දකිනවා. මෙය ඔවුන්ගේම කුසලතා, ඉදිරිදර්ශන සහ මඟ පෙන්වීම වැඩි දියුණු කරනු ඇත. මෙම මුලපිරීම හරහා ඔවුන්ට ජාතික සැලැස්මට නිසඟ දායකයින් වීමට අවස්ථාව ලබා දී ඇත. මෙය සැබවින්ම ‘රැකියාවෙන් ඔබ්බට ගිය කාර්යභාරයක්.” ව්‍යවසාය සංවර්ධන නියෝජ්‍ය අමාත්‍ය චතුරංග අබේසිංහ මහතා පැවසීය.
මෙම අවස්ථාවට කර්මාන්ත හා ව්‍යවසායකත්ව සංවර්ධන අමාත්‍යාංශයේ අතිරේක ලේකම් අනෝජා හේරත්, නියෝජ්‍ය අමාත්‍ය චතුරංග අබේසිංහගේ පෞද්ගලික ලේකම් යසස් හේවගේ, SLIM සභාපති මහාචාර්ය දේවසිරි ජයන්ත, SLIM උප සභාපති ආචාර්ය දිල්හාන් සම්පත්, කුඩා ව්‍යවසාය සංවර්ධන අංශයේ අධ්‍යක්ෂ මනෝජ් ප්‍රියන්ත;සහ බස්නාහිර පළාතේ SEDD නිලධාරීන් පිරිසක් සහභාගී වූහ.
