අර්බුදකාරී වසරවලට වඩා ගෝලීය තෙල් මිල කම්පන අවශෝෂණය කර ගැනීමට ශ්රී ලංකාව වඩා හොඳ ස්ථානයක සිටින බව මහ බැංකු අධිපති ආචාර්ය පී. නන්දලාල් වීරසිංහ මහතා පැවසීය.
හස්ලින්ඩා අමීන් සමඟ ‘IMF Conference; Asia 2050′ සමගාමීව Bloomberg සමඟ පැවති සුවිශේෂී සාකච්ඡාවකදී මහ බැංකු අධිපතිවරයා මේ බව ප්රකාශ කළේය.
තෙල් ආනයනය කරන රටක් ලෙස, ශ්රී ලංකාව ඉහළ යන ඛනිජ තෙල් මිල ගණන් වලට ගොදුරු විය හැකි බවත්, එය උද්ධමනයට සහ ගෙවුම් ශේෂයට බලපෑම් කළ හැකි බවත් ඔහු සඳහන් කළේය.
ශ්රී ලංකාවේ වත්මන් උද්ධමනය 1.6%ක් වන අතර එය මහ බැංකුවේ 5% ඉලක්කයට වඩා බෙහෙවින් අඩු බවත්, එමඟින් බාහිර මිල කම්පන කළමනාකරණය කිරීමට රටට “සැලකිය යුතු හොඳ ඉඩක්” ලබා දෙන බවත් ඔහු පෙන්වා දුන්නේය.
“ආර්ථික අර්බුදය පැවැති සමයට වඩා ආර්ථික තත්ත්වය බෙහෙවින් යහපත් තත්ත්වයක තිබෙනවා. ආර්ථික අර්බුදය සමයේ උද්ධමනය 70% දක්වා ඉහළ ගියා. නමුත් අද අඩු උද්ධමනය සහ ඔරොත්තු දීමේ හැකියාව වැඩිවීමත් සමඟ අපි අතීතයේ සිටි තැනට සාපේක්ෂව හොඳින් සූදානම්ව සිටිනවා” ආචාර්ය වීරසිංහ මහතා පැවසීය.
ශ්රී ලංකාව ශක්තිමත් විදේශ සංචිත ගොඩනඟා ඇති බවත්, ආර්ථික අර්බුදය අතරතුර ශුන්යයට ආසන්න මට්ටමේ පැවැති විදේශ සංචිත වර්තමානය වන විට ඇමරිකානු ඩොලර් බිලියන 7කට වඩා ඉහළ ගොස් ඇති බවත් මහ බැංක අධිපතිවරයා පැවසුවේය.
“එමඟින් බාහිර අංශය සඳහා බෆරයක් නිර්මාණය වෙනවා” ඔහු අවධාරණය කළේය.
උද්ධමනය ඉලක්ක කරගත් රාමුවක කම්පන අවශෝෂකයක් ලෙස විනිමය අනුපාතය ක්රියා කරන බවත්, හදිසි බාහිර පීඩනවලට ප්රතිචාර දැක්වීමට ආර්ථිකයට උපකාරී වන බවත් ඔහු පැහැදිලි කළේය.
“දිගු කම්පන තවමත් ආර්ථික වර්ධනය මන්දගාමී කළ හැකියි. නමුත්, රට මෙවර පෙරට වඩා හොඳින් සූදානම්” බව ඔහු අවධාරණය කළේය.
ඉරාන ගැටුම සති කිහිපයකට වඩා ඉදිරියට ගියහොත් ශ්රී ලංකාවේ ආරක්ෂක සීමාවන් කොපමණ කාලයක් පැවතිය හැකිදැයි විමසූ විට, ආචාර්ය වීරසිංහ පැවසුවේ මෙය ශ්රී ලංකාවට සහ කලාපයට ප්රධාන ගැටලුවක් බවයි. දීර්ඝ ගැටුමක් ඛනිජ තෙල් වෙළඳපොළ, සංචාරක ව්යාපාරය, වෙළඳාම සහ ගෝලීය සැපයුම් දාමයන් කඩාකප්පල් කළ හැකි බවත්, ගෝලීය සහ දේශීය ආර්ථිකයට බරපතළ අවදානම් ඇති කළ හැකි බවත් ඔහු අනතුරු ඇඟවීය.
ගැටුමට සම්බන්ධ රටවල් දීර්ඝ ගැටුමක අහිතකර දිගු කාලීන ප්රතිවිපාක පිළිබඳව දැනුවත්ව සිටින බව ඔහු අවධාරණය කළේය. විභව ගෝලීය කම්පන මඟ හැරීම සඳහා මුදල්, මූල්ය සහ බාහිර ආරක්ෂක බාධක ගොඩනඟා ගැනීමෙන් ශ්රී ලංකාව ඕනෑම ප්රතිඵලයකට සූදානම් විය යුතු බව ඔහු පැවසීය.
