“තරුණයින් කෘෂිකර්මාන්තයේ අනාගතයයි, ඔවුන්ට සාර්ථක වීමට කුසලතා, දැනුම සහ සම්පත් ලබා දීම අත්‍යවශ්‍යයි .” – ආචාර්ය Kanayo Nwanze, හිටපු සභාපති, කෘෂිකාර්මික සංවර්ධනය සඳහා වූ ජාත්‍යන්තර අරමුදල (International Fund for Agricultural Development(IFAD)
හැඳින්වීම
කෘෂිකර්මාන්තය සාම්ප්‍රදායිකව පැරණි පරම්පරාවන් සමඟ සම්බන්ධ වී ඇත, නමුත් තරුණ, තාක්ෂණික දැනුමැති සහ නව්‍ය ගොවීන්ගේ නව රැල්ලක් කර්මාන්තය නැවත හැඩගස්වමින් සිටී. මෙම තරුණ ගොවීන් නවීන ශිල්පීය ක්‍රම අනුගමනය කරනවා පමණක් නොව; ආහාර සුරක්ෂිතතාව, දේශගුණික විපර්යාස සහ තිරසාර සංවර්ධනය ඇතුළු ලෝකයේ වඩාත්ම දැවෙන අභියෝග කිහිපයකට විසඳුම් සෙවීමේ පුරෝගාමීන් ද වේ.
නැවුම් අදහස්, තිරසාර භාවිතයන් සහ උසස් තාක්ෂණයන් හඳුන්වා දීමෙන්, ඔවුන් වඩාත් ඔරොත්තු දෙන සහ කාර්යක්ෂම ආහාර පද්ධතියක් ගොඩනඟමින් සිටිති. මෙම මාරුව ගොවිතැන ගැන පමණක් නොවේ, එය ලොව පුරා ප්‍රජාවන් සඳහා දීප්තිමත්, වඩා තිරසාර අනාගතයක් නිර්මාණය කිරීම ගැන ය.
කෘෂිකර්මාන්තයේ තරුණයින්ගේ වැදගත්කම
කෘෂිකර්මාන්තයේ අනාගතය සඳහා තරුණයින් අත්‍යවශ්‍ය වන්නේ ඔවුන් නව තාක්ෂණයන් සහ භාවිතයන් අනුගමනය කිරීමට වඩාත් විවෘත බැවිනි. නිරවද්‍ය ගොවිතැන සහ සිරස් ගොවිතැන වැනි නවෝත්පාදන හඳුන්වා දීමෙන් කර්මාන්තය පරිවර්තනය කිරීමේ හැකියාව ඔවුන්ට ඇත. කෘෂිකර්මාන්තය සඳහා තරුණ සහභාගීත්වය දිරිමත් කිරීම ග්‍රාමීය ප්‍රදේශ පුනර්ජීවනය කිරීමට, රැකියා අවස්ථා ලබා දීමට සහ දේශීය ආර්ථිකය නංවාලීමට ද උපකාරී වේ.
සිද්ධි අධ්‍යයන
Zandi Farms: දකුණු අප්‍රිකානු සාර්ථක කතාවක්
කෘෂිකර්මාන්තයේ තරුණයින් විසින් මෙහෙයවන ලද සාර්ථකත්වය පිළිබඳ ආශ්වාදජනක උදාහරණවලින් එකක් වන්නේ දකුණු අප්‍රිකාවේ ජොහැන්නස්බර්ග් නගරයට ආසන්නයේ පිහිටි Zandi Farms ය. සැන්ඩිලේ කුමාලෝ / Zandile Khumalo නම් 28 හැවිරිදි කෘෂිකාර්මික ව්‍යවසායකයෙක් විසින් එය පවත්වා ගෙන යනු ලබන අතර Zandi Farms හයිඩ්‍රොපොනික් ගොවිතැන / hydroponic farming සඳහා ප්‍රසිද්ධය.
(hydroponic farming – හයිඩ්‍රොපොනික් ගොවිතැන යනු පසෙහි නොව ජලයේ ශාක වගා කිරීමේ ක්‍රමයකි. පෝෂ්‍ය පදාර්ථ ජලයේ දියවී යන බැවින් ශාක මුල්වලට ඒවා ලබා ගන්නා පෝෂ්‍ය පදාර්ථ වෙත සෘජු ප්‍රවේශයක් ඇත.)
සීමිත ජල සම්පත්වල අභියෝගයට මුහුණ දුන්න ද, සැන්ඩයිල් සැම්ප්‍රදායික ගොවිතැනට වඩා 90%ක් අඩුවෙන් ජලය භාවිතා කරන ජල කාර්යක්ෂම පද්ධතියක් සංවර්ධනය කිරීම සඳහා කෘෂිකාර්මික විද්‍යාව පිළිබඳ ඇගේ අධ්‍යාපන පසුබිම උපයෝගී කර ගත්තාය.
Zandi Farms 2018 දී කුඩා ව්‍යාපෘතියක් ලෙස ආරම්භ කරන ලද නමුත් එතැන් සිට එය දේශීය අවන්හල් සහ වෙළඳපොළවල් වලට එළවළු වර්ග ගණනාවක් සපයන සමෘද්ධිමත් ව්‍යාපාරයක් දක්වා වර්ධනය වී තිබේ.
කෘෂි විද්‍යාව පිළිබඳ දැනුම නවීන තාක්ෂණය සමඟ ඒකාබද්ධ කරමින් සැන්ඩිල්ගේ නවෝත්පාදන ප්‍රවේශය ඉහළ අස්වැන්නක් සහ වසර පුරා නිෂ්පාදනයක් ලබා ගැනීමට හේතු වී තිබේ. ඇය දේශීය තරුණයින් වෙනුවෙන් පුහුණු වැඩසටහන් ද සංවිධානය කරන අතර, කෘෂිකර්මාන්තයේ වෘත්තීන් සලකා බැලීමට ඔවුන් දිරිමත් කරන අතර සාර්ථක වීමට අවශ්‍ය කුසලතා වලින් ඔවුන් සවිබල ගන්වයි.
කෘෂිකර්මාන්තයේ තරුණයින්ගේ වැදගත්කම
ජනගහනයෙන් අඩකට වඩා තම ජීවනෝපාය සඳහා කෘෂිකර්මාන්තය මත යැපෙන රටක, කෘෂිකර්මාන්තය සඳහා තරුණයින්ගේ සහභාගීත්වය ඉතා වැදගත් වේ. ඵලදායිතාව සහ වෙළඳපොළ ප්‍රවේශය වැඩි දියුණු කිරීම සඳහා නිරවද්‍ය ගොවිතැන, කාබනික ගොවිතැන සහ ඩිජිටල් අලෙවිකරණය වැනි අති නවීන තාක්ෂණයන් හඳුන්වා දීමට තරුණයින්ට හැකිය.
වැඩිවන ග්‍රාමීය-නාගරික සංක්‍රමණයත් සමඟ, ග්‍රාමීය ආර්ථිකයන් තිරසාර කිරීම සඳහා තරුණ ගොවීන්ගේ කාර්යභාරය කවරදාටත් වඩා වැදගත් වේ. නව ක්‍රම සහ තාක්ෂණයන්ට ඉක්මනින් අනුවර්තනය වීමට ඔවුන්ට ඇති හැකියාව සාම්ප්‍රදායික සහ නවීන කෘෂිකර්මාන්තය අතර පරතරය පියවීමට උපකාරී වේ.
සචින් කේල්: මහාරාෂ්ට්‍රයේ තිරසාර කෘෂිකර්මාන්තයේ පුරෝගාමියා
මහාරාෂ්ට්‍රයේ 34 හැවිරිදි කෘෂිකාර්මික ව්‍යවසායකයෙකු වන සචින් කේල් / Sachin Kale කෘෂිකර්මාන්තයේ තරුණයින්ගේ බලය විදහා දක්වයි. වසර ගණනාවක් ඉංජිනේරුවෙකු ලෙස සේවය කිරීමෙන් පසු ඔහු වෘත්තීන් වෙනස් කර ගොවිතැන් කිරීමට තීරණය කළේය. සචින් ඔහුගේ ගොවිපළ ස්ථාපිත කළ අතර “නවෝත්පාදක කෘෂි ජීවිත විසඳුම්,” යන නමින් එය සංකල්ප ගත කළේය. ඒකාබද්ධ ගොවිතැන් පද්ධතිය (Integrated Farming System – IFS) ඔහුගේ ශිල්පීය ක්‍රමය විය. මෙම ආකෘතිය බෝග නිෂ්පාදනය, කුකුළු මස්, මත්ස්‍ය ගොවිතැන සහ ජීව වායු නිෂ්පාදනය ඒකාබද්ධ කරමින්, සම්පත් භාවිතය උපරිම කරන සහ නාස්තිය අවම කරන ස්වයංපෝෂිත පද්ධතියක් නිර්මාණය කරයි.
සචින්ගේ නව්‍ය ක්‍රමවලින් එකක් වන්නේ කුකුළු හා මාළු ගොවිතැනෙන් ලැබෙන අපද්‍රව්‍ය බෝග සඳහා ස්වාභාවික පොහොරක් ලෙස භාවිතා කිරීම මඟින් යෙදවුම් පිරිවැය සැලකිය යුතු ලෙස අඩු කිරීම සහ පසෙහි සෞඛ්‍යය වැඩි දියුණු කිරීමයි.
ඔහුගේ ගොවිපළ ජල භාවිතය ප්‍රශස්ත කිරීම සඳහා බිංදු ජල සම්පාදන හා සූර්ය බලයෙන් ක්‍රියාත්මක වන පද්ධති භාවිතා කරන අතර එමඟින් බොහෝ ගොවීන් මුහුණ දෙන ප්‍රධාන අභියෝගයකට මුහුණ දෙයි. වසර කිහිපයක් ඇතුළත, සචින්ගේ ගොවිපළ තිරසාර කෘෂිකර්මාන්තය සඳහා ආදර්ශයක් බවට පත් වූ අතර බොහෝ තරුණයින් ගොවිතැන ලාභදායී වෘත්තියක් ලෙස සැලකීමට පෙළඹවීමක් එමඟින් ඇති කළේය.
අභියෝග ජය ගැනීම: තරුණ ගොවීන්ට සහාය වීම
සාර්ථක කතා තිබුණත්, කෘෂිකර්මාන්තයේ නියැලෙන තරුණ තරුණියන් තවමත් අභියෝග කිහිපයකට මුහුණ දෙමින් සිටියි. ඉඩම්, ප්‍රාග්ධනය සහ සම්පත් සඳහා සීමිත ප්‍රවේශයක් මෙන්ම පුහුණුවක් සහ උපදේශකත්වයක් නොමැතිකම මෙයට ඇතුළත් වේ. සංජානන ගැටලුවක් ද ඇත. බොහෝ තරුණයින් ගොවිතැන අඩු ආදායම්ලාභී සහ අඩු සමාජ තත්ත්වයක් සහිත රැකියාවක් ලෙස සලකති.
කෘෂිකර්මාන්තයට ඉහළ තරුණ පිරිසක් ආකර්ෂණය කර ගැනීම සඳහා, ප්‍රතිපත්තිමය සහාය, ණය සඳහා පහසු ප්‍රවේශය සහ නවීන ගොවිතැන ශක්‍ය වෘත්තියක් ලෙස පිළිගන්නා සමාජ පසුබිමක් නිර්මාණය කරන අධ්‍යාපනික වැඩසටහන් අවශ්‍ය වේ.
තාක්ෂණයේ සහ නවෝත්පාදනයේ කාර්යභාරය
තරුණ ගොවීන් නව තාක්ෂණයන් අත්හදා බැලීමට සහ ඒවා භාවිතා කිරීමට වැඩි ඉඩක් ඇත. උදාහරණයක් ලෙස, ඩ්‍රෝන යානා, ස්වයංක්‍රීයකරණය සහ දත්ත විශ්ලේෂණ මගින් බෝග වගා කරන, නිරීක්ෂණය කරන සහ අස්වැන්න නෙළන ආකාරය පරිවර්තනය වෙමින් පවතී. කෘත්‍රිම බුද්ධිය (AI) සහ IoT (Internet of Things) භාවිතය කෘෂිකර්මාන්තය වඩාත් කාර්යක්ෂම හා තිරසාර කිරීමට, ජල හිඟය සහ පාංශු හායනය වැනි ගැටලු විසඳීමට උපකාරී වේ. හයිඩ්‍රොපොනික්, ජලධර විද්‍යාව සහ සිරස් ගොවිතැන වැනි නවෝත්පාදනයන් නාගරික ප්‍රදේශවල ගොවිතැන් කිරීමට ඉඩ සලසන අතර එමඟින් කෘෂිකර්මාන්තය තරුණ පරම්පරාවන්ට වඩාත් ප්‍රවේශ විය හැකි තැනක් බවට පත්කරයි.
සංඛ්‍යාලේඛන
1. ආහාර හා කෘෂිකර්ම සංවිධානයට (Food and Agriculture Organization – FAO) අනුව, ලොව පුරා ගොවීන්ගේ සාමාන්‍ය වයස අවුරුදු 60ක් වන අතර, එමඟින් තරුණයින් වැඩි වැඩියෙන් මෙම අංශයට පිවිසීමට දිරිමත් කිරීමේ හදිසි අවශ්‍යතාවය ඉස්මතු වේ.
2. ගෝලීය ජනගහනයෙන් ආසන්න වශයෙන් 15%ක් පමණ තරුණයින් (වයස අවුරුදු 15-24) වුව ද, ඔවුන් කෘෂිකාර්මික සේවකයින්ගෙන් (FAO) 2%ක් පමණක් නියෝජනය කරන අතර එය සැලකිය යුතු පරතරයක් පෙන්නුම් කරයි.
3. ජාත්‍යන්තර තරුණ ගොවි සන්ධානය වාර්තා කරන්නේ, තරුණ ගොවීන්ගෙන් 75%ක් ගොවිපළක හැදී වැඩී නොමැති බවයි, එය කෘෂිකර්මාන්තයට පිවිසෙන අයගේ ජන විකාශනයේ වෙනසක් පෙන්නුම් කරයි.
4. නාගරීකරණය සහ වයස්ගත වන ගොවි ජනගහනය හේතුවෙන් (ජාත්‍යන්තර කම්කරු සංවිධානය) 2030 වන විට කෘෂිකාර්මික ශ්‍රම බලකාය 25%කින් අඩු වනු ඇතැයි පුරෝකථනය කර ඇත.
වාර්තා සහ අධ්‍යයන
ආහාර සහ කෘෂිකර්ම සංවිධානයේ “The State of Food and Agriculture 2019” වාර්තාව ගෝලීය ආහාර සුරක්ෂිතතාව සහ තිරසාරභාවය පිළිබඳ අභියෝගවලට මුහුණ දීම සඳහා තරුණයින් විසින් මෙහෙයවනු ලබන නව්‍ය ගොවිතැන් පිළිවෙත්වල අවශ්‍යතාවය අවධාරණය කරයි.
කෘෂිකාර්මික සංවර්ධනය සඳහා වූ ජාත්‍යන්තර අරමුදලේ (International Fund for Agricultural Development – IFAD ) “Rural Development Report 2020”: නවීන ශිල්පීය ක්‍රම සහ ව්‍යවසායකත්වය තුළින් ග්‍රාමීය ආර්ථිකයන් පරිවර්තනය කිරීමේදී සහ ඵලදායිතාව ඉහළ නැංවීමේදී තරුණයින් විසින් මෙහෙයවනු ලබන කෘෂිකර්මාන්තයේ විභවය ඉස්මතු කරයි.
ලෝක බැංකුවේ “Youth in Agriculture’’ නමින් 2019 දී නිකුත් කළ වාර්තාව අධ්‍යාපනය, සම්පත් සහ තාක්ෂණයට ප්‍රවේශය ලබා දීමෙන් තරුණයින් කෘෂිකර්මාන්තයට සම්බන්ධ කර ගැනීමේ උපාය මාර්ග ගවේෂණය කරන අතර ගෝලීය ආහාර පද්ධතිවල අනාගතයේදී තරුණ ගොවීන්ගේ කාර්යභාරය අවධාරණය කරයි.
කෘෂිකර්මාන්තයේ තරුණයින්ට සහාය වන සංවිධාන
- කෘෂිකාර්මික සංවර්ධනය සඳහා වූ ජාත්‍යන්තර අරමුදල (International Fund for Agricultural Development – IFAD)
- ආහාර හා කෘෂිකර්ම සංවිධානය (Food and Agriculture Organization – FAO)
- කෘෂිකාර්මික සංවර්ධනය සඳහා තරුණ වෘත්තිකයන් (Young Professionals for Agricultural Development – YPARD)
නිගමනය: කෘෂිකර්මාන්තයේ අනාගතය හැඩගැස්වීම
කෘෂිකර්මාන්තයේ අනාගතය සඳහා නව පරම්පරාවේ ගොවීන් ඉතා වැදගත් වේ. තාක්ෂණය, තිරසාර භාවිතයන් සහ නව ව්‍යාපාර ආකෘති වැලඳ ගැනීමෙන්, ඔවුන් ගොවිතැන නැවත අර්ථකථනය කරමින් සිටින අතර එය ලාභදායී, බලපෑම් සහගත සහ ප්‍රතිලාභදායක විය හැකි බව ඔප්පු කරමින් සිටී.
Zandi Farms සහ Innovative Agrilife Solutions වැනි සාර්ථක කතාවලින් පෙනී යන්නේ නිවැරදි මෙවලම් සහ අවස්ථා සමඟින්, තරුණයින්ට කෘෂිකර්මාන්තයේ දියුණු විය හැකි බවත්, තිරසාර ආහාර පද්ධතියක් නිර්මාණය කිරීමට මඟ පෙන්වන බවත්ය.
තරුණ ගොවීන් බෝග වගා කිරීම පමණක් නොවේ, ඔවුන් වඩා හොඳ, තිරසාර අනාගතයක් සඳහා බලාපොරොත්තුවක් වගා කරමින් සිටිති. තරුණයින් සඳහා ආයෝජනය කිරීමෙන් සහ කෘෂිකර්මාන්තය ආකර්ශනීය වෘත්තීය මාර්ගයක් බවට පත් කිරීමෙන් මෙම වැදගත් කර්මාන්තය අඛණ්ඩව වර්ධනය වන අතර නවෝත්පාදනයන් සිදු වන බව අපට සහතික කළ හැකිය.
සකස් කළේ – වරුණි ජයතුංග, විමර්ශන නිලධාරිනී, HARTI – DevPro කාන්තා කෘෂි ව්‍යවසායකත්ව ව්‍යාපෘතිය, හෙක්ටර් කොබ්බෑකඩුව ගොවිකටයුතු පර්යේෂණ හා පුහුණුකිරීමේ ආයතනය
මූලාශ්‍රය – https://agrinextcon.com/youth-in-agriculture-the-new-generation-of-farmers/
